ఆంధ్రప్రదేశ్‌లో ప్రస్తుతం ఒక విచిత్రమైన రాజకీయ వాతావరణం నెలకొంది. కూటమి ప్రభుత్వం చేపడుతున్న ప్రతి అభివృద్ధి కార్యక్రమం వెనుక, ప్రతి సంక్షేమ పథకం వెనుక మా ముద్ర ఉంది అని వైసీపీ క్లెయిమ్ చేసుకోవడం చర్చనీయాంశంగా మారింది. అధికారం పోయినా సరే, ఇంకా పాత రికార్డులనే తిరగేస్తూ.. ప్రజల్లో ఉన్న వ్యతిరేకతను గమనించకుండా చేస్తున్న ఈ ప్రయత్నాలు ఆ పార్టీకే నష్టం చేకూర్చేలా ఉన్నాయి.

ఐదేళ్ల పాలన vs అప్పుల గాలం

ఐదేళ్లలో వైసీపీ పాలన ఎలా సాగిందో ప్రజలకు స్పష్టమైన అవగాహన ఉంది. సంక్షేమం పేరుతో పంపిణీ చేసిన నగదు బదిలీ మినహా, రాష్ట్రంలో శాశ్వతమైన అభివృద్ధి ఏమీ జరగలేదన్నది కాదనలేని వాస్తవం. పరిశ్రమలు రాకపోవడం, ఉన్నవి పక్క రాష్ట్రాలకు తరలిపోవడం చూసిన ప్రజలు.. ఇప్పుడు కొత్త ప్రభుత్వం తెస్తున్న పెట్టుబడులను చూసి హర్షిస్తుంటే, వైసీపీ నేతలు మాత్రం ఇవన్నీ మేమే తెచ్చాం అని చెప్పుకోవడం హాస్యాస్పదంగా మారింది. అభివృద్ధి అనేది నిరంతర ప్రక్రియే కానీ, ఏమీ చేయకుండానే అంతా మా వల్లే జరిగిందనడం ప్రజలను మోసం చేయడమే.

క్రెడిట్ చోరీ.. ఆత్మవంచనేనా?

రాజకీయాల్లో ఏ పార్టీ అయినా తాము చేసిన పనులను చెప్పుకోవడం సహజం. కానీ, జగన్ మోహన్ రెడ్డి నుంచి కింది స్థాయి కార్యకర్త వరకు ప్రతి విషయంలోనూ క్రెడిట్ కోసం పాకులాడటం చూస్తుంటే, అది ప్రజల్ని నమ్మించడానికి కాకుండా.. తమను తాము మోసం చేసుకోవడానికి చేస్తున్న ప్రయత్నంలా కనిపిస్తోంది. పెట్టుబడిదారులతో ఫోటో లు దిగినంత మాత్రాన పరిశ్రమలు వచ్చేసినట్లు కాదు. వాటిని నిలబెట్టుకోవడానికి కావాల్సిన పారిశ్రామిక వాతావరణం కల్పించడంలో గత ప్రభుత్వం విఫలమైందన్నది ఎన్నికల ఫలితాలే నిరూపించాయి. గతంలో ఆగిపోయిన పనులను ఇప్పుడు వేగవంతం చేస్తుంటే, అవి తమ ఖాతాలో వేసుకోవాలనుకోవడం వృథా ప్రయాస. వైసీపీ నేతలు ఒక విషయాన్ని మర్చిపోతున్నారు: ప్రజల జ్ఞాపకశక్తి చాలా తక్కువ అని వారు భావిస్తున్నారు. కానీ, ఐదేళ్ల పాటు అనుభవించిన కష్టాలు, ఉపాధి లేక వలసలు పోయిన యువత, పడకేసిన వ్యవస్థలు ప్రజల కళ్లముందే ఉన్నాయి. జగన్ పాలనలో జరిగిన తప్పిదాలను అంత త్వరగా మర్చిపోవడానికి ఏపీ ప్రజలేమీ అమాయకులు కాదు. ప్రభుత్వం అంటే కేవలం బటన్ నొక్కడం కాదు, రాష్ట్రాన్ని నిర్మించడం అని ఇప్పుడు ప్రజలు భావిస్తున్నారు.

పరువు తీసుకుంటున్న పార్టీ తీరు

ప్రతి మంచి పనికీ నేనే.. నేనే..అంటూ రావడం వల్ల వైసీపీకి వచ్చే మైలేజీ కంటే పోయే పరువే ఎక్కువ. రాసేసుకోవడానికి పని అనేది సొంత ఆస్తి కాదు, అది ఒక బాధ్యత.

బాధ్యతగా ఉన్నప్పుడు చేయలేని పనులను, వేరొకరు చేస్తుంటే మావి అని చెప్పుకోవడం వల్ల రాజకీయంగా మరింత పతనం అయ్యే అవకాశం ఉంది. క్రెడిట్ కోసం ప్రయత్నించే బదులు, విపక్షంగా నిర్మాణాత్మకమైన విమర్శలు చేస్తూ ప్రజల్లో మళ్లీ నమ్మకాన్ని పెంచుకోవడానికి ప్రయత్నించడం మంచిది.. అధికారం కోల్పోయిన తర్వాత కూడా పాత పద్ధతులనే నమ్ముకోవడం, వాస్తవాలను అంగీకరించకపోవడం వైసీపీని మరింత ఇబ్బందుల్లోకి నెడుతుంది. చేసిన పనులకు క్రెడిట్ దక్కడం వేరు, చేస్తున్న పనులను దొంగిలించడం వేరు. ఈ సూక్ష్మ వ్యత్యాసాన్ని వైసీపీ నేతలు గుర్తించనంత కాలం ప్రజల నుంచి వారు ఆశించే ఆదరణ లభించడం కష్టమే.