ఒకప్పుడు సినిమా బాగుందా? లేదా? అని పోల్చిచూసేవారు. ఏ హీరో బాగా యాక్ట్ చేస్తున్నాడు అని మాత్రమే చర్చించుకునేవారు. ఆ తర్వాత థియేటర్స్ సంఖ్య ప్రామాణికమైపోయింది. ఏ సినిమా ఎన్ని ఎక్కువ థియేటర్స్‌లో ఆడింది? 50 రోజుల థియేటర్స్ ఎన్ని? 100 రోజల థియేటర్స్ ఎన్ని? అని డిస్కస్ చేసి నంబర్ ఒన్ హిట్‌ని, హీరో క్రేజ్‌ని డిసైడ్ చేసేసేవారు. కానీ ప్రస్తుతం మాత్రం వ్యవహారమంతా కూడా కలెక్షన్స్ లెక్కల్లోకి వచ్చేసింది. అలాగే సోషల్ మీడియా ట్రెండింగ్ కూడా ప్రామాణికమైపోయింది. సోషల్ మీడియా ట్రెండింగ్, హిట్స్‌ని బేస్ చేసుకుని చూస్తే మాత్రం రామ్ చరణ్, బాలకృష్ణలు ఎన్టీఆర్‌ని బీట్ చేయలేకపోయారు అని చెప్పొచ్చు. యూట్యూబ్‌లో విడుదలైన ఆరుగంటల్లోనే జనతా గ్యారేజ్ సినిమా టీజర్ మిలియన్ మార్క్ హిట్స్‌ని క్రాస్ చేసింది. మెగా పవర్ స్టార్ రామ్ చరణ్ సినిమా ధృవ టీజర్ కానీ, అలాగే బాలయ్యబాబు ఎంతో ప్రతిష్టాత్మకంగా తీసుకుని చేస్తున్న వందో సినిమా గౌతమీ పుత్ర శాతకర్ణి కానీ జనతా టీజర్ రికార్డ్‌ని టచ్ చేయలేకపోయాయి.
రికార్డ్‌ల విషయం పక్కన పెట్టినా ధృవ, గౌతమీ పుత్ర శాతకర్ణి టీజర్స్‌కి ఆడియన్స్ నుంచి వస్తున్న రిపోర్ట్స్ అయితే మాత్రం అంత ప్రోత్సాహకరంగా లేవు. ధృవ టీజర్ మేకింగ్ చాలా స్టైలిష్‌గా ఉంది. టెక్నికల్‌గా అద్భుతం అంటున్నారు. కానీ రామ్ చరణ్ యాక్టింగ్ గురించి మాత్రం లైట్ తీసుకుంటున్నారు. ఇక గౌతమీ పుత్ర శాతకర్ణి సినిమా మేకింగ్ పైనే బోలెడన్ని సందేహాలు వస్తున్నాయి. భారీ స్థాయిలో, చాలా ఎక్కువ టైం తీసుకుని, చాలా శ్రధ్ధగా తెరకెక్కించాల్సిన మన తెలుగు వీరుడి కథను బాలకృష్ణ సంక్రాంతి సెంటిమెంట్‌ని దృష్టిలో పెట్టుకుని, సంక్రాంతికి రిలీజ్ చేయాలన్న తొందరలో త్వరత్వరగా చుట్టేస్తున్నారేమోనని అనిపిస్తోంది. గౌతమీ పుత్ర శాతకర్ణి ఫస్ట్ లుక్, టీజర్‌లు బాలయ్య అభిమానులకు నచ్చాయోమో కానీ సాధారణ ప్రేక్షకుల నుంచి మాత్రం విమర్శలే ఎక్కువగా వినిపిస్తున్నాయి. రామ్ చరణ్ విషయం ఎలా ఉన్నా ‘గౌతమీ పుత్ర శాతకర్ణి’ సినిమా అద్భుతంగా తెరకెక్కాలని చాలా మంది తెలుగు ప్రేక్షకులు కోరుకుంటున్నారు. తెలుగు వాళ్ళకు తెలియని తెలుగు చక్రవర్తి కథను క్రిష్ ఏ స్థాయిలో తెరెక్కిస్తాడో? ఏ రేంజ్‌లో మనల్ని మెప్పిస్తాడో చూడాలి మరి.
