ఓ సినిమా ప్రేక్షకుల్లో తీసుకెళ్లే మార్గాలు రెండే రెండు.. ఒకటి క్షణం తీరికలేకుండా సినిమాను ప్రచారం చేయడం.. లేదా వదిలిన టీజర్స్, ట్రైలర్స్ తో ప్రేక్షకులను క్షణం కూడా మిస్ అవ్వనివ్వకపోవడం. ఈ రెండిటిలో వచ్చిన ‘క్షణం’ అనేదే సినిమా టైటిల్ గా పెట్టి సినిమాను వదులుతున్నారు. అయితే పైన చెప్పిన రెండు సూత్రాలు పాటిస్తూ ప్రేక్షకులు సినిమా రిలీజ్ కోసం ఎదురు చూసేలా చేస్తుంది. నూతన దర్శకుడు రవికాంత్ దర్శకత్వంలో వస్తున్న క్షణం సినిమా మొత్తం కోటి లోపే మడతెట్టేశారట.
ఓ చిన్న పాప కిడ్నాప్ మిస్టరీతో తెరకెక్కిన ఈ సినిమా ముందు మార్చ్ 4న రిలీజ్ అనుకున్నా సినిమా మీద ఉన్న నమ్మకంతో ఈ నెల 26న రిలీజ్ చేసేందుకు సిద్ధమయ్యారు. అయితే కోటి బడ్జెట్ సినిమాకు ఇంత భారీ క్రేజ్ రావడానికి కారణం ‘క్షణం’ సినిమా భారీ సినిమాలను నిర్మిస్తున్న పివిపి బ్యానర్ లో నిర్మించబడటమే. పరం వి పొట్లూరి నిర్మిస్తున్న ఈ సినిమాలో అడివి శేష్, అదా శర్మ లీడ్ రోల్స్ చేస్తుండగా.. అనసూయ ప్రత్యేక పాత్రలో కనబడుతుంది.
అయితే ప్రస్తుతం ట్రెండింగ్ మీదున్న ఈ సినిమా రిలీజ్ గురించి ఓవర్సీస్ లో కూడా మంచి ఉత్సాహం కనబడుతుంది. ఇక ఈ సినిమాకు పనిచేసిన కెమెరామెన్ షానియోల్ డియో.. హాలీవుడ్ సినిమాలకు కెమెరామెన్ గా పనిచేశాడట. క్షణం కథ నచ్చి ఈ సినిమాకు కావాలని పనిచేశాడట కెమెరామెన్. అయితే సినిమా బడ్జెట్ కోటి మాత్రమే అయినా సినిమా ప్రమోషన్ కు అర కోటి దాకా ఖర్చుచేస్తున్నారని తెలుస్తుంది. మరి ఫిబ్రవరి 26న వస్తున్న ఈ క్షణం సినిమా అయినా పివిపి బ్యానర్ కు హిట్ ఇస్తుందో లేదో చూడాలి.
