టాలీవుడ్కి పెళ్లిళ్ల సీజన్ వచ్చేసినట్టుంది. అఖిల్ పెళ్లికి రెడీ అయ్యాడు. నాగచైతన్య కూడా త్వరలోనే ఓ ఇంటివాడు కాబోతున్నాడు. ప్రభాస్, రానాలు 2017లో పెళ్లి చేసుకోనున్నారని టాక్. అనుష్కకీ సంబంధం ఖాయమైపోయిందంటున్నారు. ఇప్పుడు దేవిశ్రీ ప్రసాద్ మనసు కూడా పెళ్లి వైపు పరుగులు పెడుతోందని టాక్. దేవీశ్రీ ప్రసాద్ వయసు 35. అంటే దాదాపుగా పెళ్లీడు వచ్చి వెళ్లిపోతోంది కూడా. దేవి పెళ్లి గురించి ఎప్పటి నుంచో గాసిప్పులు నడుస్తున్నాయి. ఓ కథానాయికతో పీకల్లోతు ప్రేమలో ఉన్నాడని, వాళ్లిద్దరూ పెళ్లి చేసుకొంటారని చెప్పుకొన్నారు. అయితే.. అవన్నీ గాసిప్పులుగా తేలిపోయాయి. ఈసారి దేవికి ఇంట్లో ఓ సంబంధం ఖాయం చేశారట. ఇటీవల దేవి తండ్రి సత్యమూర్తి కన్నుమూశారు. అందుకే వీలైనంత త్వరలో ఆ ఇంట్లో ఓ శుభకార్యం చేయాలని ఇంట్లోవాళ్లు పట్టుబడుతున్నారని తెలుస్తోంది. దానికి దేవి పెళ్లితో ముడిపెట్టారట.
దేవి కూడా త్వరగా పెళ్లి చేసుకొని సెటిలైపోవాలని చూస్తున్నాడు. దేవిశ్రీ కి ఇంట్లో వాళ్లు ఓ సంబంధం చూశారని, అమ్మాయిది తూర్పుగోదావరిలోని ఓ పల్లెటూరని, బాగా చదువుకొన్న కుటుంబం అని తెలుస్తోంది. దేవికీ ఈ సంబంధం నచ్చిందని తెలుస్తోంది. 2017 ప్రధమార్థంలో దేవి పెళ్లి ఉండొచ్చని విశ్వసనీయ వర్గాల సమాచారం. ప్రస్తుతం ఖైదీ నెం. 150కి బ్యాక్ గ్రౌండ్ స్కోర్ అందించే పనిలో బిజీగా ఉన్నాడు దేవిశ్రీ. ఈ స్వర సంచలనం నోరు విప్పితే గానీ పెళ్లి కి సంబంధించిన డిటైల్స్ తెలీవు.