కొండ నాలికకు ముందేస్తే ఉన్న నాలిక ఊడిందన్నట్లుగా మారింది వైసీపీ పరిస్థితి. వైఎస్ఆర్‌సీపీలో అన్ని జిల్లాలో అసంతృప్తి స్వరాలు పెరిగిపోతున్నాయి. తమపై సొంత పార్టీ నేతలే కుట్రలు చేస్తున్నారని.. బాలినేని, అనిల్ లాంటి మాజీ మంత్రులు కూడా మీడియాకు ఎక్కాల్సిన పరిస్థితి ఏర‌్పడింది. అటు కడప నుంచి ఇటు సిక్కోలు వరకూ వైసీపీలో ఎవరి పరిస్థితి ప్రశాంతంగా లేదు. అన్ని జిల్లాల్లోనూ నేతలు ఒకరిపై ఒకరు కుట్రలు చేసుకుటున్నారన్న ఆరోపణలు ఎవరికి వారు చేసుకుంటున్నారు. అవి అంతకంతక పెరిగిపోతున్నాయి. దీనికి సీఎం జగన్ తీరు కూడా కారణం అవుతోంది. తాజాగా దర్శి ఎమ్మెల్యే వ్యాఖ్యలే దీనికి సాక్ష్యంగా కనిపిస్తున్నాయి.
మెజార్టీ నియోజకవర్గాల్లో ఆధిపత్యపోరాటం సాగుతోంది. దీంతో విభేదాలు పార్టీని బలహీనపరిచేలా ఉంటున్నాయి. కానీ హైకమాండ్ మాత్రం పెద్దగా పట్టించుకోవడం లేదు. కొంద‌రు బ‌య‌ట ప‌డుతున్నారు. మ‌రికొంద‌రు వేచి చూస్తున్నారు. పార్టీలో అధినేతకు సన్నిహితులుగా పేరుపడ్డ వారు సైతం అసంతృప్తితో రగిలిపోతున్నారు. వారు కూడా అధినేతకు చెప్పుకోలేక మీడియాకు ఎక్కుతున్నారు. హైకమాండ్ జిల్లాలో నాయకుల మధ్య ఆధిపత్య పోరాటంపై తక్షణం దృష్టి పెట్టాలన్న సూచనలు చేస్తున్నా.. వారు ఇతర పనులతో బిజీగా ఉన్నారు.
పార్టీలో అంతర్గత రాజకీయాల కారణంగా పార్టీ నేతలను ఒకరికొకరు దెబ్బతీసుకునే వ్యూహాలను కొంత కాలంగా వైఎస్ఆర్‌సీపీ నేతలు చేసుకుంటున్నారని ఆ పార్టీ నేతుల చెప్పుకుంటున్నారు. ప్రతి జిల్లాలో దాదాపుగా సగం నియోజకవర్గాల్లో ఇలాంటి పరిస్థితి ఉందంటున్నారు. పార్టీలో ముఖ్య నేతల వద్ద ప్రాపకం సంపాదించి ప్రత్యేకంగా వర్గం ఏర్పాటు చేసుకుని పోటీగా ఉన్న వారిపై పైచేయి సాధించడానికి వివాదాల్లోకి లాగే ప్రయత్నం చేస్తున్నారని చెబుతున్నారు. వివాదాస్పద వీడియోలు వెలుగులోకి రావడానికి కూడా వైసీపీ నేతల అంతర్గత పోరాటమేనని చెబుతున్నారు.
ప్రస్తుతానికి వైసీపీ హైకమండ్ తాము ఏం చేయాలనుకుంటున్నామో అదే చేస్తున్నారు. పరిస్థితుల్ని అర్థం చేసుకుని.. దానికి తగ్గట్లుగా నిర్ణయాలు తీసుకోవడం లేదు.
