నాని నిర్మాత‌గా మారిన ‘అ’పై మంచి అంచ‌నాలే ఉన్నాయి. ప్ర‌చార చిత్రం ఆక‌ట్టుకుంది. దాంతో పాటు స్టార్ కాస్ట్ కూడా గ‌ట్టిగానే ఉంది. నాని నుంచి ఓ సినిమా వ‌స్తోందంటే అంతా ఆస‌క్తిగా ఎదురుచూస్తుంటారు. అందులోనూ నిర్మాత‌గా మారాడంటే ఆ ఆస‌క్తి రెట్టింపు అవుతుంది. ‘అ’ క‌థ‌కు సంబంధించి ఇప్ప‌టి వ‌ర‌కూ ఎలాంటి క్లూ లేదు. ఏడెనిమిది క‌థ‌ల‌ను గొలుసుక‌ట్టుగా మార్చి.. ఒక్కో క‌థ చెబుతూ వెళ్తారు. చివ‌రికి ఆ క‌థ‌ల‌న్నీ ఒకే చోట చేరుతాయ‌న్న‌ది కాన్సెప్ట్‌.
అయితే ఇదో హాలీవుడ్ సినిమాకి కాపీ అని తెలుస్తోంది. 2007లో ‘రాట‌టూలి’ అనే యానిమేష‌న్ సినిమా వ‌చ్చింది. ఆ క‌థ ఇంచుమించుగా ఒక్క‌టే అని టాక్‌. ఓ రెస్టారెంట్ నేప‌థ్యంలో సాగే సినిమా అది. అందులో వంట వాడికి వంట బొత్తిగా రాదు. ఆ రెస్టారెంట్లో తిరిగే ఎలుక… ఆ వంట‌వాడికి స‌ల‌హాలు ఇస్తుంటుంది. దాని మాట‌లు వింటూ… వంట చేస్తుంటాడు. అదో సెప‌రేట్ ట్రాక్. రెస్టారెంట్ నేప‌థ్యంలో స‌మాంత‌రంగా కొన్ని క‌థలు జ‌రుగుతుంటాయి. చివ‌రికి అవ‌న్నీ ఓకే చోట చేర‌తాయి. ‘అ’లోనూ అంతే. ఇందులో ఎలుక బ‌దులుగా చేప‌ని తీసుకొచ్చారు. ఎక్వేరియంలో ఉన్న చేప.. వంట‌వాడితో మాట్లాడ‌డ‌మే ఈ క‌థ స్పెషాలిటీ. అంటే.. నాని కూడా చివ‌రాఖ‌రికి హాలీవుడ్ సినిమాని కాపీ కొట్టేశాడ‌న్న‌మాట. ‘అజ్ఞాత‌వాసి’ విష‌యంలోనే నిర్మాత‌లు ఇప్ప‌టి వ‌ర‌కూ లాక్కోలేక పీక్కోలేక ఇబ్బంది ప‌డుతున్నారు. మ‌రి నాని విష‌యంలో ఏం జ‌రుగుతుందో చూడాలి.
