దేశ‌మంతా ర‌జ‌నీ మానియా ప‌ట్టుకొంది. అంతటా క‌బాలి గురించే చ‌ర్చ. క‌బాలి విడుద‌ల ద‌గ్గ‌ర ప‌డుతున్న కొద్దీ… ర‌జ‌నీ అభిమానుల్లో అంచ‌నాలు ఆకాశానికి అంటుతున్నాయి. దానికి తోడు చిత్ర‌బృందం కూడా వినూత్న రీతిలో ప‌బ్లిసిటీ చేస్తోంది. క‌బాలి పాట‌లు ఒకొక్క‌టీ బ‌య‌ట‌కు వ‌స్తున్నాయ్‌. టీజ‌ర్లో డైలాగులు అభిమానుల్ని ఉర్రూత‌లూగిస్తున్నాయి. క‌బాలిలో ర‌జ‌నీ స్టైల్ గురించి జ‌నం మాట్లాడుకొంటున్నారు. తెల్ల‌టి గ‌డ్డం, తెల్ల జుత్తుతో ర‌జ‌నీ ఇంకా స్టైలీష్‌గా క‌నిపిస్తున్నాడు. ర‌జ‌నీకాంత్‌ని ఇలా చూపించాల‌న్న ఆలోచ‌న ద‌ర్శ‌కుడు రంజిత్ పాకి ఎలా వ‌చ్చింది?? ఈ సీక్రెట్‌ని రంజిత్ చెప్పేశాడు.
క‌బాలి క‌థ చెప్ప‌డానికి ర‌జ‌నీ కాంత్ ఇంటికి వెళ్లాడ‌ట రంజిత్. అప్పుడు ర‌జ‌నీకాంత్ తెల్ల‌గడ్డం, తెల్ల‌జుత్తుతో మెరుస్తూ క‌నిపించార‌ట. ఆ గెట‌ప్పేనా సినిమాలో ఎందుకు ఉండ‌కూడ‌దు అని రంజిత్‌కి అనిపించ‌దట. దాన్నే ఫాలో అయిపోయాడు. ”ర‌జ‌నీసార్‌కి స‌హ‌జంగా క‌నిపించ‌డ‌మే ఇష్టం. నాకూ ఆయ‌న‌లో అదే న‌చ్చింది. మేక‌ప్‌లేకుండానూ ఆయ‌న స్టైల్ గా క‌నిపించారు. నా సినిమాలోనూ ఆయ‌న్ని అలానే చూపించాల‌ని డిసైడ్ అయ్యాను. అందుకు ర‌జ‌నీసార్ కూడా ఒప్పుకొన్నారు” అంటూ ర‌జ‌నీ స్టైల్ సీక్రెట్ బ‌య‌ట‌పెట్టాడు ద‌ర్శ‌కుడు.
