స్టార్ హీరో పుట్టిన రోజు అంటే.. ఆ హంగామానే వేరుగా ఉంటుంది. స‌ద‌రు హీరో సినిమా రిలీజ్ అయినంత సంబ‌రాలు చేసుకొంటారు అభిమానులు. హీరోలూ అంతే. ఫ్యాన్స్‌ని ఏదోలా సంతృప్తి ప‌ర‌చాల‌ని చూస్తుంటారు. తాజాగా ఎన్టీఆర్ కూడా అదే ప‌నిలో ఉన్నాడు. మే 20న ఎన్టీఆర్ పుట్టిన రోజు. ఈ సంద‌ర్భంగా ఫ్యాన్స్‌కి ఓ గిఫ్ట్ ఇవ్వాల‌నుకొంటున్నాడు ఎన్టీఆర్. త‌ను క‌థానాయ‌కుడిగా న‌టిస్తున్న చిత్రం ‘జై ల‌వ‌కుశ’. ఈ చిత్రానికి సంబంధించిన ఫ‌స్ట్ లుక్‌ని ఈనెల 19న విడుద‌ల చేయ‌నున్నారు.
ఇందులో ఎన్టీఆర్ మూడు పాత్ర‌ల్లో క‌నిపించ‌నున్న సంగ‌తి తెలిసిందే. ఈమూడు గెట‌ప్పుల‌నీ ఒకేసారి రివీల్ చేయ‌బోతున్నార్ట. ఒక్కో గెట‌ప్‌నీ ఒక్కోసారి చూపించాల‌ని చిత్ర‌బృందం భావించింది. తెర‌పై బొమ్మ ప‌డేంత వ‌ర‌కూ స‌స్పెన్స్ కొన‌సాగిద్దాం అని కూడా అనుకొంది. కాకపోతే గెట‌ప్‌ల‌ను దాచి పెడితే. ఫ్యాన్స్ మ‌రీ ఎక్కువ ఊహించేసుకొంటారేమో అని ఆలోచించింద‌ట. అందుకే.. మూడు గెట‌ప్పులూ ఒకేసారి రివీల్ చేస్తే బెట‌ర్ అని ఫిక్స‌యిన‌ట్టు తెలుస్తోంది. ఇప్ప‌టికే రెండు మూడు పోస్ట‌ర్ల‌ని ద‌ర్శ‌కుడు బాబి డిజైన్ చేశాడ‌ని, అందులో ఒక‌దాన్ని ఎన్టీఆర్ ఫిక్స్ చేయాల్సివుంద‌ని స‌మాచారం.
