వైఎస్సార్ కాంగ్రెస్ పార్టీ ప్రభుత్వ హయాంలో వాలంటీర్ల వ్యవస్థపై పవన్ కల్యాణ్ చేసిన వ్యాఖ్యల నేపథ్యంలో నమోదైన క్రిమినల్ డెఫమేషన్ కేసులో ఏపీ హైకోర్టు వ్యాఖ్యలు ఇప్పుడు వైరల్‌గా మారాయి. పవన్‌ను లక్ష్యంగా చేసుకుని అప్పట్లో ప్రభుత్వం జారీ చేసిన జీవోలను, అనుసరించిన విధానాలను కోర్టు తప్పుబట్టడం రాజకీయంగా ప్రాధాన్యత సంతరించుకుంది.

పీ ఫిర్యాదుపై న్యాయస్థానం సూటి ప్రశ్న

గత ఎన్నికలకు ముందు వాలంటీర్ల వ్యవస్థలో లోపాలను, డేటా చోరీ అంశాలను ప్రస్తావిస్తూ పవన్ కల్యాణ్ చేసిన వ్యాఖ్యలపై ప్రభుత్వం క్రిమినల్ పరువు నష్టం దావా వేసింది. దీనికోసం ప్రత్యేకంగా జీవోలను విడుదల చేసి పబ్లిక్ ప్రాసిక్యూటర్ ద్వారా ఫిర్యాదు చేయించింది. అయితే, దీనిపై విచారణ జరిపిన హైకోర్టు కీలక ప్రశ్నలు సంధించింది. పవన్ కల్యాణ్ ఆ సమయంలో ఒక సాధారణ పౌరుడని, ప్రజా ప్రతినిధి కాదని.. అలాంటప్పుడు ఒక వ్యక్తి చేసిన వ్యాఖ్యలపై పబ్లిక్ ప్రాసిక్యూటర్ ఎలా ఫిర్యాదు చేస్తారని కోర్టు ప్రశ్నించింది. ఒక వ్యవస్థపై చేసిన విమర్శలను పరువు నష్టంగా పరిగణించి ప్రభుత్వం ఇలాంటి చర్యలకు పూనుకోవడం నిబంధనలకు విరుద్ధమని అభిప్రాయపడింది.

జీవోల చెల్లుబాటుపై నీలినీడలు

పవన్ కల్యాణ్‌పై కేసులు పెట్టడం కోసమే ప్రభుత్వం ఉద్దేశపూర్వకంగా జీవోలు జారీ చేసిందని, ఇది అధికార దుర్వినియోగమేనని న్యాయస్థానం వ్యాఖ్యానించింది. పరువు నష్టం దావా వేయాలంటే బాధిత వ్యక్తులే నేరుగా కోర్టును ఆశ్రయించాలని, కానీ ప్రభుత్వం మధ్యలో అడ్వకేట్ జనరల్ , పీపీ ద్వారా జీవోలు ఇచ్చి కేసులు పెట్టించడం చట్టపరంగా నిలబడదని కోర్టు స్పష్టం చేసింది. సీఆర్పీసీ సెక్షన్ 199(2) ప్రకారం ఉన్న వెసులుబాటును ప్రభుత్వం తనకు అనుకూలంగా వాడుకోవాలని చూడటం సరికాదని, ఈ కేసులో ప్రాథమిక నిబంధనలే పాటించలేదని ధర్మాసనం ఎత్తిచూపింది.

రాజకీయ కక్షసాధింపు చర్యగానే గుర్తింపు?

వాలంటీర్ల వ్యవస్థను విమర్శించినందుకు పవన్‌ను ఇబ్బంది పెట్టడమే లక్ష్యంగా అప్పటి ప్రభుత్వం పావులు కదిపిందని తాజా పరిణామాలు ధృవీకరిస్తున్నాయి. వాలంటీర్ల గౌరవానికి భంగం కలిగిందని చెబుతూనే, వారిని అడ్డు పెట్టుకుని రాజకీయ ప్రత్యర్థిని నిలువరించాలని చూడటం ప్రజాస్వామ్య విరుద్ధమని విశ్లేషకులు భావిస్తున్నారు. ఒక రాజకీయ పార్టీ నేతగా వ్యవస్థలలోని లోపాలను ఎత్తిచూపే హక్కు పవన్‌కు ఉందని, దానికి బదులు తీర్చుకోవడానికి ప్రభుత్వ యంత్రాంగాన్ని వాడటం తప్పుడు సంప్రదాయమని కోర్టు వ్యాఖ్యల ద్వారా స్పష్టమవుతోంది.

వైసీపీ హయాంలో రాజకీయ ప్రత్యర్థులపై దాడులకు చేసిన అరాచకం మరోసారి స్పష్టమవుతోంది.