తెలంగాణ అన్నదాతలకు పెట్టుబడి సాయం అందించే రైతు భరోసా పథకం తొలి విడత నిధులను ముఖ్యమంత్రి రేవంత్ రెడ్డి నర్మెట్ట వేదికగా విడుదల చేశారు. గత ప్రభుత్వాల కంటే మిన్నగా రైతు సంక్షేమానికి తమ ప్రభుత్వం కట్టుబడి ఉన్నామని స్పష్టం చేశారు. కేవలం 17 నెలల వ్యవధిలోనే సుమారు రూ. 1.40 లక్షల కోట్లు వ్యవసాయ రంగానికి ఖర్చు చేశామని, ప్రతి నెలా సగటున రూ. 5,500 కోట్లు రైతుల కోసం వ్యయం చేస్తున్నామని తెలిపారు. ఈ పథకం కింద 70 లక్షల మంది చిన్న, సన్నకారు రైతులకు లబ్ధి చేకూరుస్తూ, తొలి విడతగా రూ. 3,590 కోట్లు నేరుగా వారి ఖాతాల్లో జమ చేస్తున్నట్లు ప్రకటించారు.

ప్రతిపక్ష నేతలు చేస్తున్న విమర్శలపై రేవంత్ రెడ్డి ఘాటుగా స్పందించారు. తమ ప్రభుత్వంపై విమర్శలు చేస్తున్న వారికి తమ ప్రభుత్వం ఇస్తున్న నిధులే సమాధానమని చెప్పారు. మద్దతు ధరతో పాటు క్వింటాల్‌కు రూ. 500 బోనస్ ఇస్తున్న ఏకైక ప్రభుత్వం తమదేనని గుర్తుచేశారు. రైతుల కళ్లలో ఆనందం చూడటమే తమ ధ్యేయమని, ఎంత ఆర్థిక ఇబ్బందులు ఉన్నా సంక్షేమ పథకాలను ఆపబోమని స్పష్టం చేశారు. అంకాపూర్ చికెన్ తరహాలో రైతులు అనుబంధ రంగాల్లోనూ నైపుణ్యం సాధించి ఆర్థికంగా ఎదగాలని, దానికి అవసరమైన సాంకేతికతను ప్రభుత్వం అందిస్తుందని హామీ ఇచ్చారు.

మొత్తం రూ. 9,000 కోట్ల రైతు భరోసా నిధులను మూడు విడతల్లో పంపిణీ చేయనున్నట్లు సీఎం వివరించారు. ఈరోజు విడుదల చేసిన మొదటి విడత నిధులు సోమవారం నాటికి రైతుల ఖాతాల్లో జమ అవుతాయని, మిగిలిన రూ. 5,400 కోట్లను వచ్చే 45 రోజుల్లో రెండు విడతలుగా పూర్తి చేస్తామని స్పష్టమైన కాలపరిమితిని ప్రకటించారు. వ్యవసాయాన్ని లాభసాటిగా మార్చే దిశగా నర్మెట్టలో రూ. 300 కోట్లతో నిర్మించిన ఆయిల్ పామ్ ఫ్యాక్టరీని సీఎం ప్రారంభించి రైతులకు అంకితం చేశారు.

కేవలం వరి పంటకే పరిమితం కాకుండా, రైతులు లాభదాయకమైన వాణిజ్య పంటల వైపు మళ్లాలని ఆయన పిలుపునిచ్చారు. రాష్ట్రంలో పామాయిల్ సాగును 10 లక్షల ఎకరాలకు పెంచడమే లక్ష్యమని, పండించిన ప్రతి గింజను ప్రభుత్వం కొనుగోలు చేస్తుందని భరోసా ఇచ్చారు. ఈ ఫ్యాక్టరీతో పాటు ఇక్కడ ఒక ఆయిల్ రిఫైనరీ యూనిట్‌కు కూడా ఆయన శంకుస్థాపన చేశారు. విజయ బ్రాండ్ పేరుతో ఈ నూనెను నేరుగా మార్కెట్లోకి తెస్తామని వెల్లడించారు.