సప్నా చౌదరి అనే భోజ్ పురి నటి వ్యవహారం… కాంగ్రెస్, బీజేపీ మధ్య మంటలు రాజేస్తోంది. సప్నా చౌదరీని కాంగ్రెస్ లో చేర్చుకోవడంతో పాటు వారణాసిలో పోటీ చేయించాలని హస్తం పార్టీ భావిస్తున్నట్లు ఒక ప్రచారం జరిగింది. స్టేజ్ డ్యాన్సులకు పేరు పొందిన భోజ్ పురి నటి సప్న.. వారణాసిలో ప్రచారానికి వస్తే జనం తెగబడతారని బీజేపీ అనుమానిస్తోంది.దానితో ప్రచార శైలి మారిపోయే ప్రమాదం ఉందని భయపడుతోంది. అందుకే సప్న పేరు చెప్పగానే బీజేపీ అంతెత్తున ఎగిరిపడుతోంది. మరో పక్క యూపీలో ఇప్పుడు టఫ్ ఫైట్ ఖాయమని తాజా సర్వేలు చెబుతున్నాయి.అక్కడ 80 నియోజకవర్గాల్లో గత ఎన్నికల్లో బీజేపీ 71 చోట్ల గెలిచింది. ఇప్పుడా పరిస్థితి లేదని తేల్చేశారు. ఎస్పీ – బీఎస్పీ కలిసి పోటీ చేస్తున్న తరుణంలో బీజేపీకి గడ్డు కాలం ఖాయమని గత ఎన్నికల్లో వచ్చిన ఓట్ల శాతాన్ని బట్టి తెలుస్తోంది. ఎన్ని నియోజకవర్గాల్లో బీజేపీ గెలుస్తుందో చెప్పలేని పరిస్థితి నెలకొంది.
పార్టీని గెలిపించి తీరుతామన్న బాధ్యతను నెత్తికెత్తుకున్న యూపీ బీజేపీ నేతలకు ఇప్పుడు ముచ్చెమటలు పడుతున్నాయి బీజేపీ నేతలు సప్నా చౌదరిపై తీవ్ర స్థాయిలో విరుచుకుపడుతున్నారు. సురేంద్ర సింగ్ అనే బీజేపీ నేత సోనియాగాంధీలాగే ఆమె డాన్సర్ అని పోల్చితే… యూపీ మంత్రి శ్రీకాంత్ శర్మ మరో అడుగు ముందుకేశారు. కాంగ్రెస్ అధ్యక్షుడు రాహుల్ గాంధీని కొజ్జా అంటూ సంబోధించారు. కాంగ్రెస్ పెద్దగా స్పందించకపోయినా.. కాంగ్రెస్ మిత్రపక్షం ఆర్జేడీ మాత్రం అంతే తీవ్రంగా స్పందించింది. రాహుల్ కొజ్జా అయితే మోదీ ఏంటంటూ ట్విటర్‌లో ప్రశ్నించింది. మరో వైపు..ఈ గొడవల కారణంగా కాంగ్రెస్లో చేరినట్లు ప్రచారం జరిగిన సప్నా చౌదరీ యూటర్న్‌ తీసుకున్నారు. తాను కాంగ్రెస్లో చేరలేదనీ, అసలు ఏ పార్టీ తరఫునా పోటీ కూడా చేయట్లేదని, ప్రియాంక గాంధీతో ఉన్న ఫోటో కూడా పాతదని ఆమె ట్విటర్‌ వేదికగా వివరణ ఇచ్చారు. దీంతో కాంగ్రెస్ పార్టీలో గందరగోళం నెలకొంది.
దీంతో కాంగ్రెస్ ఆమె పార్టీలో చేరేందుకు ఫారం నింపుతున్న ఓ వీడియోను బయటపెట్టడంతో అది వైరల్‌ అయ్యింది. ‘ఆమె స్వయంగా శనివారం నాడు పార్టీ ఆఫీసుకొచ్చి ఫారం నింపి వెళ్లారు. ఆమె సోదరి కూడా కాంగ్రెస్లో చేరారు’ అని యూపీసీసీ ప్రధాన కార్యదర్శి నరేంద్ర రథి ప్రకటించారు. ఈ గొడవ జరుగూతండగానే ఢిల్లీ బీజేపీ అధ్యక్షుడు మనోజ్‌ తివారీతో సప్న భేటీ అయ్యారనే ఫోటోలు బయటకు వచ్చాయి. ఇప్పుడీ సప్నా చౌదరీ ఏ పార్టీలో ఉన్నారన్నది హాట్ టాపిక్ అయింది.
