బిగ్ బాస్ 4లో శ్ర‌ద్ధాదాస్ ఉన్న‌ట్టు ముందు నుంచీ వార్త‌లు వినిపిస్తూనే ఉన్నాయి. బిగ్ బాస్ ప్ర‌స్తావ‌న ఎప్పుడు వ‌చ్చినా – శ్ర‌ద్ధాదాస్ గురించే మాట్లాడుకున్నారు. అయితే… ఈ సీజ‌న్ లో తాను లేన‌ని, అస‌లు బిగ్ బాస్ లో పాల్గొవాల‌న్న ఆలోచ‌న తనకు రాలేద‌ని చెప్పేసింది శ్ర‌ద్ధా. త‌న‌ని బిగ్ బాస్ షోలో పాల్గొన‌మ‌ని ఎవరూ సంప్ర‌దించ‌లేద‌ని, ఇవ‌న్నీ పుకార్లేన‌ని కొట్టి పారేసింది. సోషల్ మీడియాలో వ‌స్తున్న వార్త‌లు చూసి ఓపిక ప‌ట్టాన‌ని, ఇక స‌హించేది లేద‌ని, ఇదే మొద‌టి, చివ‌రి హెచ్చ‌రిక అంటూ వార్నింగ్ ఇచ్చింది. త‌న గురించి ఎవ‌రైనా, ఏమైనా రాయాల‌నుకుంటే ముందు త‌న‌ని సంప్ర‌దించాల‌ని, తాను ఎప్పుడూ అందుబాటులో ఉంటాన‌ని చెప్పుకొచ్చింది. త‌రుణ్ పై కూడా ఇలాంటి వార్త‌లే వ‌చ్చాయి. త‌రుణ్ ఈ సీజ‌న్ లో క‌నిపిస్తాడ‌ని చెప్పుకున్నారు. కానీ త‌రుణ్ కూడా ఈ షోలో పాల్గొన‌డం లేద‌ని క్లారిటీ ఇచ్చాడు. జాబితాలో 16 మంది సెల‌బ్రెటీల పేర్లు వినిపిస్తున్నా, వాళ్లెవ‌రూ ఖాయం కాదు. బిగ్ బాస్ యాజ‌మాన్యం ప్ర‌క‌టించే వ‌ర‌కూ.. ఎవ‌రెవ‌రు ఈ షోలో పాల్గొంటారో చెప్ప‌డం కష్టమే.
శ్ర‌ద్దాదాస్ ‘బిగ్’ వార్నింగ్
