ఘోర ఓటమికి కారణాలేంటో వెతుక్కునే పనిలో పడింది తెలుగుదేశం పార్టీ. ఇప్పటికే అంతర్గతంగా కొంత చర్చ జరిగినా.. రాష్ట్రవ్యాప్తంగా నేతలంతా ఒక్కచోటకు చేరి ఓటమిపై విశ్లేషించారు. ప్రతి జిల్లా నుంచి గెలిచిన ఎమ్మెల్యేలతో పాటు పోటీ చేసిన నేతలు, సీనియర్‌ కార్యకర్తలు హాజరయ్యి.. తమ వాదనలు వినిపించారు. ఓటమిపై తెలుగుదేశం పార్టీలో అంతర్మథనం మొదలైంది. రాష్ట్రవ్యాప్తంగా పార్టీ నేతలంతా విజయవాడలో సమావేశం అయ్యారు. ఏ వన్‌ కన్వెన్షన్‌ సెంటర్‌లో పార్టీ నేతలు, కార్యకర్తలు ఓటమికి కారణాలపై సుదీర్ఘంగా విశ్లేషించారు. ప్రతిసారి ఓటమికి కారణాలు కనిపించేవని.. కానీ ఈ సారి ఎన్నికల్లో చెప్పుకోదగ్గ కారణాలేవి కనిపించడం లేదని స్వయంగా పార్టీ అధినేత చంద్రబాబు వ్యాఖ్యానించారు. గత అయిదేళ్లలో ఎప్పుడూ చేయనన్ని అభివృద్ధి కార్యక్రమాలు చేసినా… ఓటమి పాలవ్వడంపై క్షేత్రస్థాయిలో విశ్లేషించుకోవాల్సిన అవసరం ఉందన్నారు చంద్రబాబు.
ఎన్నికల్లో ఘోర ఓటమిపై పార్టీ నేతలు తమ అభిప్రాయాలు చెప్పారు. రాష్ట్రవ్యాప్తంగా అన్ని జిల్లాల నుంచి వచ్చిన నేతలు… తమ నియోజకవర్గాల్లో జరిగిన పరిణామాలపై సుదీర్ఘంగా వివరించారు. వేలమందితో ఒకేసారి చంద్రబాబు టెలీకాన్ఫరెన్స్‌లను సీనియర్‌ నేత అశోక్‌గజపతిరాజు తప్పుబట్టారు. వేలమందితో కాన్ఫరెన్స్‌ వల్ల వాస్తవాలు చెప్పే అవకాశం లేకుండా పోయిందన్నారు. ఇక తెలుగుదేశం పార్టీలో హ్యూమన్‌ టచ్‌ పోయిందన్నారు జూపూడి ప్రభాకర్‌. కార్యకర్తలకు, నేతలకు చంద్రబాబు బాగా దూరం అయ్యారని.. అందుకే పార్టీ ఓడిపోయిందని విశ్లేషించారు. రియల్‌టైమ్‌ గవర్నెన్స్‌ కొంప ముంచిందన్నారు ఎమ్మెల్సీ గౌరవాని శ్రీనివాసులు. ఇక కోడెల అక్రమాలపై జనం ఎన్నికల సమయంలోనే ప్రస్తావించారని టీడీపీ అధికార ప్రతినిధి దివ్యవాణి తన అభిప్రాయాలు చెప్పారు. రాష్ట్రవ్యాప్తంగా సమావేశంలో పాల్గొన్న నేతలు చెప్పిన మాటల్ని చంద్రబాబు పూర్తిగా విన్నారు. క్షేత్రస్థాయిలో కారణాలపై లోతైన విశ్లేషణ చేసుకోవాల్సిన అవసరం ఉందన్నారు. తప్పుల్ని సరిదిద్దుకోవాల్సిన అవసరం ఉందని సూచించారు. గతంలోనూ పార్టీ ఓటమి పాలైనా.. తిరిగి విజయం సాధించిందని.. ఇప్పుడు కూడా అదే జరుగుతుందన్నారు. భవిష్యత్‌లో గెలుపు ఖాయం అన్నారు.
రాష్ట్రం సంక్షోభంలో ఉన్నప్పుడు మాత్రమే…, ప్రజలు చంద్రబాబును నాయకుడిగా కోరుకుంటున్నారని తన అభిప్రాయం వ్యక్తం చేశారు ఎంపీ గల్లా జయ్‌దేవ్. ఓటమికి అనేక కారణాలున్నాయని.. సోషల్‌ ఇంజనీరింగ్‌ కూడా అందులో ఓ కారణం అని అభిప్రాయపడ్డారు. రాష్ట్ర సమావేశంలో కార్యకర్తలపై సుదీర్ఘంగా చర్చ జరిగింది. పార్టీకి కార్యకర్తలే వెన్నెముక అని…, వారిని కాపాడుకుంటామన్నారు చంద్రబాబు. ఎన్నికల ఫలితాల తరువాత వైసీపీ దాడుల్లో ఐదుగురు టీడీపీ కార్యకర్తలు చనిపోయారని.. వారికి పార్టీ తరపున ఐదేసి లక్షల చొప్పున నష్టపరిహారం ప్రకటించారు. దాడుల్ని నియంత్రించాలని ప్రభుత్వాన్ని డిమాండ్ చేశారు. ఎన్నికల్లో ఓటమిపై మరింత లోతైన విశ్లేషణ జరగాల్సి ఉందని టీడీపీ నేతలు తేల్చారు. ఇందుకోసం పార్టీ అధినేత చంద్రబాబు త్రిసభ్య కమిటీని ఏర్పాటు చేశారు. ప్రతి పార్లమెంట్ నియోజకవర్గం పరిధిలో ఓటమికి గల కారణాలపై త్రిసభ్య కమిటీ నివేదిక తయారుచేస్తుందని స్పష్టం చేశారు. పార్టీని ముందుకు తీసుకెళ్లడం చారిత్రక అవసరమని నేతలకు చంద్రబాబు దిశానిర్దేశం చేశారు.
