తెలంగాణలో ప్రణీత్ రావు అనే డీఎస్పీని ప్రభుత్వం సస్పెండ్ చేసింది. ఆయన ఎస్ఐబీలో ఉంటూ ఫోన్ ట్యాపింగ్ వ్యవహారాలు చక్కబెట్టారు. టెర్రరిస్టులు, నక్సలైట్లపై చేయాల్సిన ట్యాపింగ్ రాజకీయ నాయకులపై ప్రయోగించారు. కాంగ్రెస్ గెలిచే ప రిస్థితి లేదని మళ్లీ బాపు కేసీఆరే సీఎం అవుతారని గట్టి నమ్మకంతో … అధికారికంగా విచ్చలవిడితనంతో తన అధికార దుర్వినియోగం చేశారు. ఇప్పుడు అది బయటపడుతోంది.
అయితే ఒక డీఎస్పీ ఇదంతా చేయగలరా .. అంటే చాన్సే లేదని అర్థం చేసుకోవచ్చు. అసలు బాసులు వేరే ఉన్నారు. రిటైరైపోయినా ఇంటలిజెన్స్ లో కీలక పాత్ర పోషించినా ప్రభాకర్ రావు అనే పెద్దమనిషి… అటు కేసీఆర్ ఫ్యామిలీకి.. ఇటు ట్యాపింగ్ కు మధ్య అనుసంధానకర్త. కేసీఆర్ ఓడిపోగానే మొదటగా రాజీనామా చేసింది ఆయనే. వెంటనే… ప్రణీత్ రావు తన అధీనంలో ఉన్న రికార్డులన్నింటినీ చెరిపేశారు. సీసీ కెమెరాలను ఆఫీసులో ఆపు చేయించి మరీ .. ఈ పని చేశారు. ఇప్పుడు వాటిని రీట్రీవ్ చేసే ప్రయత్నం చేస్తున్నారు.
ప్రణీత్ రావు ఓ ఎస్ఐ మాత్రమే. ఆయన బ్యాచ్లో అందరూ ఎస్‌ఐలు అయితే ఈయన ఒక్కడికే డీఎస్పీ ప్రమోషన్ ఇచ్చారు. ట్యాపింగ్ పనులు చేయించుకున్నారు. తెలంగాణ ఏర్పడిన తర్వాత పదేళ్ల కాలంలో ఎవరికీ స్వేచ్చ లేదు. అప్పటి ఏపీ సీఎం ఫోన్ ను ట్యాప్ చేశారు. ఆ ఫోన్ కాల్ రికార్డింగ్ కూడా బయటకు వచ్చింది. ఆ తర్వాత ఎంతో మంది ఎమ్మెల్యేల ఫిరాయింపులకు కూడా ట్యాపింగ్‌తోనే వల వేశారన్న అనుమానాలు ఉన్నాయి. అవన్నీ బయటపడితే.. వ్యవహారం తీవ్రంగా మారే అవకాశం ఉంది.
