విక్రమ్ న‌టుడిగా ఎప్పుడూ ఫెయిల్ కాలేదు. ప్ర‌తీసారీ ఏదో ఓ రూపంలో కొత్త‌ద‌నం ఇవ్వాల‌నే ప్ర‌య‌త్నం చేస్తూనే ఉంటాడు. అదే త‌న ప్ల‌స్సు, అదే మైన‌స్సు కూడా. మితిమీరిన ప్ర‌యోగాల‌తో చేతులు కాల్చుకోవ‌డం విక్ర‌మ్‌కు అల‌వాటు. పైగా గెట‌ప్పుల పిచ్చి ఎక్కువ. ప్ర‌తీ సినిమాలోనూ నాలుగైదు గెట‌ప్పులు ట్రై చేస్తుంటాడు. దాంతో.. విక్రమ్ సినిమాలు అటు క‌మ‌ర్షియ‌ల్ సెట‌ప్పుల‌కు, ఇటు ప్ర‌యోగాత్మ‌క చిత్రాల‌కూ కాకుండా పోతున్నాయి. త‌న త‌ప్పుల్ని విక్రమ్ ఈసారి గ‌ట్టిగా ప‌సిగ‌ట్టు ఉన్నాడు. మంచి మాస్‌, క‌మ‌ర్షియ‌ల్ మీట‌ర్‌లో సినిమాని ఎంచుకొన్నాడు. అదే.. ‘వీర ధీర శూర‌న్‌’.
అరుణ్ కుమార్ ద‌ర్శక‌త్వంలో రూపొందుతున్న చిత్ర‌మిది. ఎస్‌.జె.సూర్య కీల‌క పాత్ర పోషిస్తున్నాడు. చియాన్ బ‌ర్త్ డే సంద‌ర్భంగా ఈ రోజు టీజ‌ర్ విడుద‌ల చేశారు. టీజ‌ర్ అంటే టీజ‌ర్ కాదు, సినిమాలోని ఓ సీన్‌ని డైరెక్టుగా వ‌దిలేశారు. ఈ సీన్‌తోనే హీరోయిజం పూర్తి స్థాయిలో ఎలివేట్ అయిపోయింది. సీన్ చూస్తే.. విక్రమ్ చాలా కాలం త‌ర‌వాత నేల దిగి.. త‌న నుంచి అభిమానులు ఏం కోరుకొంటున్నారో, అలాంటి క‌థ ఎంచుకొన్నాడ‌నిపిస్తోంది. విక్రమ్, ఖైదీ వైబ్స్ టీజ‌ర్లో క‌నిపిస్తున్నాయి. జి.వి.ప్ర‌కాష్ కుమార్ ఇచ్చిన బ్యాక్ గ్రౌండ్ స్కోర్ సీన్‌ని మ‌రింత‌గా ఎలివేట్ చేసింది. సినిమాలో ఏదో విష‌యం ఉంద‌న్న సంగ‌తి… ఈ చిన్న సీన్ చూస్తేనే అర్థ‌మైపోతోంది. చాలా కాలంగా విక్రమ్ ని ఊరిస్తున్న మంచి క‌మ‌ర్షియ‌ల్ హిట్ ఈ సినిమాతో ద‌క్కుతుంద‌న్న న‌మ్మ‌కం క‌లుగుతోంది. విక్రమ్ న‌టిస్తున్న 62వ చిత్ర‌మిది. తెలుగులోనూ అదే పేరుతో విడుద‌ల చేస్తున్న‌ట్టు చిత్ర‌బృందం ప్ర‌క‌టించింది.
