వరంగల్ ఉప ఎన్నికలలో వైకాపా కూడా పోటీ చేయబోతున్నట్లు ప్రకటించగానే చాలా మంది అడిగిన ప్రశ్న ‘ఎందుకు’? అని. కేవలం వైకాపాకే ఇటువంటి ప్రశ్న ఎదురవడం రాజకీయాలలో చాలా విచిత్రమే. కానీ ఆ విధంగా ప్రశ్నించడానికి కారణాలు అందరికీ తెలిసినవే. అలాగా ప్రశ్నించిన వారికి దాని సమాధానం కూడా తెలిసి ఉండటం మరో విచిత్రం. వైకాపా ఎదుర్కొంటున్న ఈ చిత్రవిచిత్ర ప్రశ్నల సంగతి ఎలా ఉన్నా మరో ఆసక్తికరమయిన వార్త వినిపిస్తోంది. వరంగల్ ఉప ఎన్నికలలో వైకాపా తరపున పోటీ చేస్తున్న నల్లా సూర్య ప్రకాష్ కి మద్దతుగా జగన్మోహన్ రెడ్డి స్వయంగా ప్రచారం చేయబోతున్నట్లు తాజా సమాచారం. ఈనెల 16 నుండి వరుసగా నాలుగు రోజుల పాటు జగన్ వరంగల్ ల్లో ప్రచారం చేస్తారని సమాచారం. అదే నిజమయితే అదీ ఒక విశేషమే. ఎందుకంటే జగన్మోహన్ రెడ్డి హైదరాబాద్ లోనే ఉంటున్నప్పటికీ తెలంగాణా జిల్లాలలో అడుగుపెట్టి చాలా కాలమే అయ్యింది. కనుక తెలంగాణా ప్రజలు ఏవిధంగా స్పందిస్తారో చూడాల్సిందే.
వరంగల్ ఉప ఎన్నికలలో జగన్ ప్రచారం!
