‘స్పెషల్ స్టేటస్ తీసుకొస్తా’ అనేదే గ‌త ఆంధ్ర ప్ర‌దేశ్ ఎన్నిక‌ల‌లో పార్టీల ప్ర‌ధాన నినాద‌మైంది. అది వ‌చ్చింది లేదు.. ఏడ్చిందీ లేదు. దాని గురించే అంతా మ‌ర్చిపోయారు. ఇప్పుడు `మా` ఎన్నిక‌ల వ్య‌వ‌హారం కూడా అలానే సాగుతోంది. మూవీ ఆర్టిస్ట్ అసోసియేష‌న్ కి సొంతంగా బిల్డింగ్ అంటూ లేదు. `మా` ఏర్ప‌డి ద‌శాబ్దాలైపోయినా, సొంత భ‌వ‌నం స‌మ‌కూర్చుకోలేక‌పోయారంతా. చిరంజీవి, మోహ‌న్ బాబు, ముర‌ళీ మోహ‌న్, నాగ‌బాబు, నాగార్జున లాంటి హేమాహేమీలంతా `మా` అధ్య‌క్షులుగా ప‌నిచేశారు. అంద‌రూ చెప్పేదొక్క‌టే..`మా`కు బిల్డింగ్ కావాలి అని. కానీ అది సాధించలేక‌పోయారు.
గ‌త ఎన్నిక‌ల‌లోనూ.. అంతా చెప్పింది ఇదే. `మా`కు సొంత భ‌వ‌నం తీసుకొస్తామ‌ని గ‌ట్టిగా వాగ్దానాలు చేశారు. ఇప్పుడూ అదే తంతు. ఈ ఎన్నిక‌ల‌లో పోటీ చేయ‌బోతున్న ప్ర‌కాష్ రాజ్ కూడా ఇదే పాత వాగ్దానాన్ని ప‌ట్టుకుని `మా` స‌భ్యుల మ‌న‌సుల్ని గెలుద్దాం అనుకుంటున్నాడు. ఆయన సొంత భ‌వ‌నాన్ని… ఫైవ్ స్టార్ సౌక‌ర్యాల‌తో ఏర్పాటు చేయిస్తానంటున్నాడు. అంటే జిమ్‌, స్విమ్మింగ్ పూల్, ఆట‌స్థ‌లం, ఫంక్ష‌న్ హాల్.. ఇలాంటి సౌక‌ర్యాల‌తో అన్న‌మాట. మంచు విష్ణు, జీవిత‌లు సైతం ఇదే వాగ్దానాన్ని ప‌ట్టుకుని ఈ ఎన్నిక‌ల‌లో గెలుద్దాం అని ఫిక్స‌యిన‌ట్టు అనిపిస్తోంది. ద‌శాబ్దాలుగా తీర‌ని క‌ల.. ఈసారి తీరుతుంద‌న్న న‌మ్మ‌కం `మా` స‌భ్యుల‌కు ఎప్పుడో పోయింది. మ‌రి ఇప్పుడు ఈ పాత చింత‌కాయ ప‌చ్చ‌డి వాగ్దానాల‌కు వాళ్లు మ‌ళ్లీ ప‌డిపోతారా?
అంత స్థాయి మ‌న‌కు లేదా?
`మా`కి బిల్డింగ్ లేక‌పోవ‌డం అన్న‌ది… నిజంగా టాలీవుడ్ కి సిగ్గు చేటే. దేశంలోనే.. అత్య‌ధిక పారితోషికం తీసుకుంటున్న న‌టులు `మా`లో ఉన్నారు. వంద‌ల కోట్ల సినిమాలు టాలీవుడ్ లో త‌యార‌వుతున్నాయి. వాళ్లెవ‌రూ… `మా`ని సొంత సంస్థ‌గా భావించ‌డం లేదా? చిరు, నాగార్జున, మోహ‌న్ బాబు, మహేష్, ప‌వ‌న్‌, ప్ర‌భాస్‌, ఎన్టీఆర్, చ‌ర‌ణ్‌, బ‌న్నీ… ఇలాంటివాళ్లంతా పూనుకుంటే `మా` భ‌వ‌నం ఎంత సేపు? `మా` బిల్డింగ్ కోసం స్థ‌లం సంపాదించాల‌ని.. ఎప్ప‌టి నుంచో ప్ర‌య‌త్నిస్తున్నారు. ప్ర‌భుత్వం కూడా సానుకూలంగానే ఉంది. కానీ అనువైన చోటే స్థ‌లం కావాల‌న్న‌ది `మా` ప‌ట్టు. ఇప్పుడు ఫిల్మ్ ఛాంబ‌ర్ కి ద‌గ్గ‌ర్లోనే.. `మా` బిల్డింగ్ ఉంటే సౌక‌ర్య‌వంతంగా ఉంటుంద‌నుకుంటున్నారు. ఫిల్మ్‌న‌గ‌ర్ లో స్థ‌లాల రేట్లు ఆకాశాన్ని దాటాయి. `మా`కు అవ‌స‌ర‌మైన స్థ‌లం ఇవ్వాలంటే వంద‌ల కోట్ల పైమాటే. అందుకే ప్ర‌భుత్వం ఓ ప‌ట్టాన ఈ స‌మ‌స్య‌ని తీర్చ‌లేక‌పోతోంది. `ప్ర‌భుత్వం స్థ‌లం ఇస్తే.. అప్పుడు భ‌వ‌నం క‌ట్టుకుందాం` అని మా స‌భ్యులు ఉన్నారు. కాబ‌ట్టి… ఈ స‌మ‌స్య అలానే ఉండిపోతోంది. `మా` అధ్య‌క్షుడిగా గెలిచిన వాళ్లంతా కొత్త‌లో `మా` భ‌వ‌నం కోసం ప్ర‌య‌త్నించిన వాళ్లే. కానీ కొంత‌కాలం ప్ర‌య‌త్నించి.. విసిగిపోయి, త‌మ ప్ర‌య‌త్నాల్ని ఆపేశారు. అధ్య‌క్షులు మారుతున్నారు గానీ, `మా` స‌మ‌స్య మాత్రం తీర‌డం లేదు. ఇన్నేళ్ల‌యినా అదే పాత వాగ్దానం ప‌ట్టుకుని వేలాడుతున్నారు. మ‌రి ఈసారి `మా` ఓట‌ర్లు.. ఈ వాగ్దానానికి మ‌ళ్లీ ప‌డిపోతారా? అన్న‌ది తేలాలంటే ఇంకొన్నాళ్లు ఆగాలి.
