ఈరోజు వినాయ‌క్ పుట్టిన రోజు. సాధార‌ణంగా… వినాయ‌క్ కి త‌న పుట్టిన రోజున ఏదో ఓ కొత్త సినిమా విశేషం బ‌య‌ట‌పెట్ట‌డం అల‌వాటు. ఇన్నేళ్లుగా త‌న కెరీర్ ఇలానే న‌డిచింది. ఈసారీ అదే ఆశించాడు. వినాయ‌క్ ప్ర‌స్తుతం రెండు సినిమాల ప‌నుల్లో బిజీగా ఉన్నాడు. `లూసీఫ‌ర్‌` రీమేక్ వినాయ‌క్ చేతిలో పెట్టారు. మ‌రోవైపు.. బాల‌కృష్ణ కోసం ఓ క‌థ రెడీ చేస్తున్నాడు. ఈ రెండు సినిమాలూ ప‌ట్టాలెక్క‌డానికి కాస్త స‌మ‌యం ప‌డుతుంది. కాక‌పోతే.. ఇందులో చిరుతో సినిమా అయితే ఫిక్స్‌. ఈసినిమాకి సంబంధించిన ఎనౌన్స్‌మెంట్ ఈరోజు వ‌స్తుంద‌న్న‌ది వినాయ‌క్ ఆశ. కానీ.. చిరు మాత్రం అలాంటి ప్ర‌య‌త్నాలేం చేయలేదు. `వినాయ‌క్‌తో మ‌రో సినిమా చేయ‌బోతున్నారు` అన్న హింట్ కూడా చిరు నుంచి రాలేదు. బాబితో సినిమా చేస్తున్న సంగ‌తి, మెహ‌ర్ రమేష్ సినిమా విష‌య‌మూ చిరు నోటి నుంచే బ‌య‌ట‌కు వ‌చ్చాయి. వినాయ‌క్ తో ప్రాజెక్ట్ అన్న‌ది ఫిల్మ్ న‌గ‌ర్ స‌ర్కిల్స్‌లో వినిపిస్తోంది త‌ప్ప, దీనిపై అఫీషియ‌ల్ గా ఎలాంటి క్లారిటీ లేదు.
ఈ కాంబో గురించిన ప్ర‌క‌ట‌న ఈరోజు వ‌స్తుంద‌ని అటు వినాయ‌క్ స‌న్నిహితులు, ఇటు చిరు ఫ్యాన్స్ అనుకున్నా – చిరు మాత్రం సైలెంట్ అయిపోయాడు. సినిమాకి సంబంధించిన ప్ర‌క‌ట‌న రాక‌పోవ‌డంతో వినాయ‌క్ కూడా నిరాశ చెందాడ‌ని ఇన్‌సైడ్ వ‌ర్గాల టాక్‌. `ఆచార్య` త‌ర‌వాత… మెహ‌ర్ రమేష్ `వేదాళం` మొద‌లైపోతుంది. ఆ త‌ర‌వాతే లూసీఫ‌ర్‌. అందుకే ఇప్పుడే చెప్పేయ‌డం ఎందుక‌ని చిరు భావించి ఉంటాడు. కానీ వినాయ‌క్ ప్ర‌స్తుతం ఖాళీ. ఏ సినిమా క‌న్‌ఫామ్ కాలేదు. ఇలాంటి స‌మ‌యంలో చిరుతో సినిమా ఖరారైతే బూస్ట‌ప్ గా ఉండేద‌నుకున్నాడు. అది జ‌ర‌గ‌లేదు.
